प्रस्तावित सुपर स्पेशालिटी हॉस्पिटल प्रकल्पास गती देण्याचे मुख्यमंत्र्यांचे निर्देश बेलापूर (वार्ताहर) – नवी मुंबईतील विविध प्रलंबित व महत्त्वाच्या विकासकामांबाबत आमदार मंदा म्हात्रे यांनी दि. १३ एप्रिल रोजी राज्याचे मुख्यमंत्री देवेंद्र फडणवीस यांची मंत्रालयातील दालनात त्यांची भेट घेऊन सविस्तर चर्चा केली. या बैठकीत नवी मुंबईच्या सर्वांगीण विकासासाठी विविध महत्त्वाच्या विषयांवर मुख्यमंत्री देवेंद्र फडणवीस यांच्याशी सकारात्मक चर्चा झाल्याचे आ.मंदा म्हात्रे यांनी सांगितले. विशेष म्हणजे प्रस्तावित सुपर स्पेशालिटी हॉस्पिटल व मेडिकल कॉलेज प्रकल्पाला लवकरात लवकर गती देण्याचे निर्देश मुख्यमंत्र्यांनी दिल्याचे सांगण्यात येते. नवी मुंबई झोपडपट्टीमुक्त करण्याच्या दृष्टीने झोपडपट्टी पुनर्वसन योजनांना गती देण्याबाबत मुख्यमंत्र्यांसमवेत यावेळी सखोल चर्चा झाली. यामुळे गोर गरीब जनेतला हक्काचे घरे उपलब्ध होतील असा विश्वास व्यक्त केला. महिला बचत गटांना त्यांच्या उत्पादनांच्या विक्रीसाठी सक्षम व्यासपीठ उपलब्ध व्हावे यासाठी उमेद मॉल' उभारण्याकरिता नवी मुंबईमध्ये १००० चौ. मी. चा भूखंड उपलब्ध करून देण्यासाठी मुख्यमंत्री देवेंद्र फडणवीस यांनी सिडकोला आदेश दिले आहेत. आ.मंदा म्हात्रे यांनी नवी मुंबईच्या विकासासाठी आवश्यक असलेल्या प्रकल्पांबाबत सातत्याने पाठपुरावा सुरू ठेवला असून, या बैठकीमुळे शहराच्या पायाभूत सुविधा, आरोग्य सेवा आणि महिला सक्षमीकरणाला नवी चालना मिळणार असल्याचा विश्वास आ.म्हात्रे यांच्यावतीने व्यक्त करण्यात आला.