नवी मुंबई - प्लास्टिक प्रतिबंधात्मक मोहीमांमध्ये सातत्य राखण्यात येत असून दि. 22 जानेवारी रोजी 5 व्यावसायिकांकडून रू. 25 हजार दंडात्मक रक्कम वसूली आणि 7 कि.ग्रॅ. प्लास्टिक पिशव्यांच्या साठा जप्त करण्याप्रमाणेच सलग दुस-या दिवशीही 23 जानेवारी रोजी राबविण्यात आलेल्या मोहीमेत 2 व्यावसायिकांकडे प्लास्टिक पिशव्यांचा वापर आढळल्याने रू. 10 हजार दंडात्मक रक्कम वसूली आणि 11.5 कि.ग्रॅ. प्लास्टिक पिशव्यांचा साठा जप्तीची धडक कारवाई करण्यात आलेली आहे.

यामध्ये वाशी विभागात 5 हजार दंडवसूली व 1 कि.ग्रॅ. प्लास्टिक पिशव्यांची जप्ती तसेच तुर्भे विभागात 5 हजार दंडवसूली आणि 3.5 कि.ग्रॅ. प्लास्टिक पिशव्या जप्त करण्यात आलेल्या आहेत. प्लास्टिकमुक्त नवी मुंबई करिता विविध माध्यमातून जनजागृती करण्यात येत आहे. तसेच प्लास्टिक प्रतिबंधात्मक मोहीमा राबविण्यात येत आहेत. याविषयी केंद्रीय व महाराष्ट्र प्रदूषण नियंत्रण मंडळाकडून प्राप्त निर्देशानुसार एकल वापर प्लास्टिक बंदीच्या अनुषंगाने विशेष मोहीमा राबविण्यात येत आहेत.

प्लास्टिकचा धोका लक्षात घेऊन नागरिकांनी प्लास्टिक पिशव्यांचा व एकल वापर प्लास्टिकच्या वस्तूंचा वापर पूर्णपणे थांबवावा आणि कापडी पिशव्यांचा पर्याय स्विकारावा असे आवाहन नवी मुंबई महानगरपालिकेच्या वतीने करण्यात येत आहे.