नवी मुंबई - नवी मुंबई महानगरपालिका सार्वत्रिक निवडणूक २०२५ च्या पार्श्वभूमीवर आदर्श आचारसंहितेची प्रभावी अंमलबजावणी करण्यासाठी राज्य निवडणूक आयोगाच्या सूचनांनुसार नवी मुंबई महानगरपालिकेकडून ९ ठिकाणी एकूण ३ सत्रांत २७ स्थिर संनिरीक्षण पथके (SST) कार्यरत आहेत. या कारवाईदरम्यान आज दिनांक ०९ जानेवारी २०२६ रोजी सकाळी १२.३५ वाजता वाशी येथील अरेंजा कॉर्नर परिसरात वाहन क्रमांक MH 43 BG 0002 (पांढरी मर्सिडीज कार) याची तपासणी करण्यात आली. या तपासणीत अंदाजे १६ लाख १६ हजार रुपयांची रोख रक्कम जप्त करण्यात आली आहे.  ही कारवाई सहाय्यक निवडणूक निर्णय अधिकारी सागर मोरे, आचारसंहिता कक्षाचे नोडल अधिकारी अमोल पालवे, तुषार दौंडकर, अधीक्षक/वसुली अधिकारी संजय गायकवाड, पोलीस नाईक सचिन सूर्यवंशी तसेच SST पथक प्रमुख अजय शेलार यांच्या उपस्थितीत करण्यात आली. या प्रकरणी आयकर विभागातील संबंधित अधिकाऱ्यांशी संपर्क साधण्यात आला असून पुढील कायदेशीर कार्यवाही सुरू आहे, अशी माहिती प्रशासनाकडून देण्यात आली आहे.