बेलापूर (वार्ताहर) - नागरिकांच्या व कामगारांच्या विविध प्रलंबीत मागण्यांची लवकरात लवकर पूर्तता व्हावी यासाठी नवीमुंबई महापालिका मुख्यालयासमोर वंचित बहुजन आघाडी, वंचित बहुजन माथाडी ट्रान्सपोर्ट व जनरल कामगार युनियनतर्फे उपोषण आंदोलन सुरु करण्यात आले आहे. वंचित बहुजन आघाडीचे बेलापूर तालुकाध्यक्ष अँड. उमेश हातेकर व वंचित बहुजन माथाडी ट्रान्सपोर्ट व जनरल कामगार युनियनचे नवी मुंबई जिल्हाध्यक्ष गजानन भोईर यांनी संयुक्त रित्या नवी मुंबई महापालिका मुख्यालयासमोर नागरिकांच्या व कामगारांच्या विविध समस्या सोडवण्यासाठी सदरचे उपोषण आंदोलन सुरू केले आहे. यात प्रामुख्याने समान काम समान वेतन लागू करावे, सेवानिवृत्त कामगारांची ग्रॅज्युटी मिळावी, सर्व कंत्राटी कामगारांचे वेतन महिन्याच्या ७ तारखेच्या आत मिळावे, घनकचरा विभागातील अतिरिक्त सुपरवायझर कमी करावेत, समाज विकास अंतर्गत ग्रंथालयात काम करणाऱ्या कामगारांना तसेच उद्यान विभागातील सफाई कामगारांना किमान वेतनाप्रमाणे वेतन द्यावे, घनकचरा विभागातील कचरा वाहतूक गाड्यांची संख्या कमी असल्याने कामगारांची पिवणूक होत आहे ते ताबडतोब थांबवून कचरा वाहतूक गाड्यांची संख्या वाढवावी, पामबीच रस्त्यावर यांत्रिकी पद्धतीने काम करणाऱ्या सफाई कामगारांना किमान वेतना प्रमाणे पगार मिळावा, माँ साहेब मीनाताई ठाकरे हॉस्पिटलचे वैद्यकीय अधीक्षक यांना निलंबित करावे तसेच संबंधित कंत्राटदाराला पालिकेच्या काळ्या यादीत समाविष्ट करण्यात यावे, करावे गावातील २ वर्षांपासून बंद असलेले सार्वजनिक शौचालय नवीन बांधावे व समाज विकास विभाग अंतर्गत मागासवर्गीयाच्या आर्थिक उन्नतीसाठी देण्यात येणाऱ्या योजना ताबडतोब द्याव्या अशा विविध मागण्यांचा समावेश आहे.