नवी मुंबई (प्रतिनिधी)- सिडकोच्या अनधिकृत बांधकामे नवी मुंबई विभागाने शहरातील अनधिकृत बांधकामांसह अतिक्रमणांवर कारवाईचा सपाटा लावला आहे. त्यानुसार काल सिडकोच्या अनधिकृत बांधकामे (उत्तर -२) विभागामार्फत घणसोली नोड से-१६, सर्व्हे नं-५८ येथील मदनकुंज अपार्टमेंटच्या आरसीसी जी प्लस ३ अनधिकृत इमारतीच्या बांधकामावर कारवाई करून सदरठिकाणचे १७ स्लॅब्स, ०५ ओटले व ०२ लाईन्स तोडण्यात आले.

दरम्यान, कारवाई करण्यापूर्वी मदनकुंज अपार्टमेंटचे अध्यक्ष व सचिव यांना अनधिकृत बांधकामप्रकरणी सिडकोतर्फे नोटीस बजावण्यात आली होती अशी माहिती सिडको अधिकाऱ्यांनी दिली.सिडकोचे मुख्य दक्षता अधिकारी सुरेश मेंगडे यांच्या निर्देशानुसार नियंत्रक अनधिकृत बांधकामे (उत्तर-२) यांच्या नेतृत्वाखाली ही कारवाई करण्यात आली. सिडकोच्या अनधिकृत बांधकामे विभागाच्या आरेखक, भूमापकांनी सदर सर्व्हेक्षण स्थळाची पाहणी केली असता, नवी मुंबई प्रकल्पाकरिता अधिसुचित, संपादित जमीन, आरेखित भूखंडावर सिडकोची परवानगी न घेता अनधिकृत बांधकाम करण्यात आल्याचे तसेच सदर इमारतीच्या ठिकाणी तळमजला, पहिला मजला व दुसऱ्या मजल्यावर रहिवाशी वापर सुरु असण्यासह तिसऱ्या मजल्याचे काम चालु असल्याचे निदर्शनास आले होते व त्यानुसार सदर इमारतीच्या अध्यक्ष/ सचिव यांना सिडकोतर्फे नोटीस बजावण्यात आली होती. मात्र त्यानंतरही सदरठिकाणी तिसऱ्या मजल्याचे काम सुरु असल्याने काल अखेरीस या इमारतीवर कारवाई करण्यात आली.