नवी मुंबई (प्रतिनिधी)- सिडकोच्या अनधिकृत बांधकामे नवी मुंबई विभागाने शहरातील अनधिकृत बांधकामांसह अतिक्रमणांवर कारवाईचा सपाटा लावला आहे. त्यानुसार काल सिडकोच्या अनधिकृत बांधकामे (न.मुं) विभागामार्फत रोजी नोड लॉजिस्टिक पार्क मौजे बेलोंडाखार. सर्वे नंबर ५९/४,५ व ६ येथे निष्कासन मोहिम राबवून सिडको अधिसूचित, संपादित जागेवरील अंदाजे क्षेत्रफळ ६०००.०० चौ. मी. जागेवरील विट बांधकाम, संरक्षण भिंत, बांधकामाचे जोते, प्रवेशद्रार, सिक्युरीटी केबिन पत्रा फेन्स इ. स्वरूपाचे अनधिकृत बांधकाम पोकलेन व जेसीबीच्या सहाय्याने तोडले. या कारवाईमुळे अनधिकृत बांधकामधारकांचे धाबे दणाणले आहे. नमूद अतिक्रमण सिडकोच्या प्रचलित नियमावली व धोरणांचा भंग करुन व सिडको महामंडळाकडून कोणत्याही प्रकारची अधिकृत परवानगी न घेता उभारण्यात आले असल्यामुळे निष्कासित करण्यात आले असल्याची माहिती सिडकोने दिली. सदरची कारवाईची ही मोहीम सिडकोचे मुख्य दक्षता अधिकारी सुरेश मेंगडे यांच्या निर्देशानुसार व मुख्य नियंत्रक, अनधिकृत बांधकामे (नवी मुंबई) यांच्या मार्गदर्शनाखाली सिडको अतिक्रमण विभागाचे अधिकारी, स्थानिक पोलिस अधिकारी व सिडको पोलीस पथक, महावितरण विभागाचे अधिकारी, सिडको सुरक्षा रक्षक आणि महाराष्ट्र सुरक्षा मंडळाचे सुरक्षा रक्षक यांच्या सहभागाने यशस्वीपणे राबविण्यात आली. या कारवाईसाठी १० लेबर, १ जेसीबी, १ पोकलेन, १ ट्रक, १ जीप असा लवाजमा तैनात ठेवण्यात आला होता.